«Ҳоким Кубоги»нинг гуруҳ босқичи 3-туридан ўрин олган «Нефтчи-2» - «Бунёдкор» (0:1) учрашувидан кейин мезбонлар устози Азиз Алижоновнинг фикрлари билан қизиқдик.

- Яхши учрашув ўтказдик. Барибир «Бунёдкор» кучли жамоа, қолаверса Суперлига иштирокчиси. Таркибида миллий терма жамоага номзод футболчилар бор. Бизнинг таркибдаги болаларнинг аксари ҳали 17 ёшни қаршиламаган. Шунинг учун шогирдларимда ҳаяжон яққол сезилиб қолди. Куни кеча телевизорда кўриб юрган футболчиларга қарши майдонга чиқишгани учун ҳаяжонга тушишди. Шунингдек, аввал икки ўйинда катта куч сарфлаганимиз ҳам бугун ўз сўзини айтди. «Бунёдкор» кучли бўлса-да, шогирдларимни майдонга тушиб  борларини беришларини, дуранг ҳам яхши натижа эканлигини тушунтиргандим. Иккинчи бўлимда бироз омадимиз келмади, дея оламан. Вазиятлардан фойдалана олмадик, аммо барибир кўпроқ тажриба ўз сўзини айтди.

Умумий маънода мусобақадаги иштирокимиздан кўнглимиз тўлди. Тўғри, дастлабки икки турдан кейин пешқадам бўлиб, сўнгги турда кичик ҳисобда ютқазиб, учинчи ўринга тушиб кетиш бироз аламли, лекин турнир барибир шогирдларимга катта мактаб вазифасини ўтаб берди. Асосий таркибга беш нафар шогирдим чақирилди. Кечаги баҳсда майдонга тушишди, асосийси шу.