2021 yilgi mavsumga nafaqat klub yoki jamoa, balki "Paxtakor" ishqibozlari ham yaxshi kayfiyatda hozirlik ko‘rishmoqda.

2020 yil koronavirus pandemiyasi sababli futbol musobaqalari aksariyat paytda muxlislarsiz yoki stadionga ishqibozlarning cheklangan miqdorda kiritilishi tarzida o‘tdi. 2021 yilda esa yurtimizda vaziyat barqaror bo‘lib turgani tufayli stadionlarda muxlislar soni ko‘payishiga ruxsat berilishi mumkin. Shu sababli "Paxtakor"ni yangi mavsumda qo‘llab-quvvatlash, jamoani ruhan qo‘llash uchun yangiliklarga qo‘l urish, muxlislar klubining yangi rejalari bilan tanishish maqsadida "Paxtakor" futbol klubi rahbariyati va muxlislar klubining faollari o‘rtasida uchrashuv o‘tkazildi. Unda ishqbozlar o‘zlarining g‘oyalari bilan rahbariyatni  tanishtirib, sevimli jamoalarini qo‘llab turish borasida yangi g‘oyalari haqida ma’lumot berishdi. O‘z navbatida klub rahbariyati doimo muxlislar bilan uchrashuvlardan xursandligi, ishqibozlar futbolning ajralmas bo‘lagi ekani va ularga ko‘mak berishga tayyor ekanliklarini ta’kidlashdi.