O‘zbekiston professional futbol ligasi direktori vazifasini bajaruvchi Diyor Imomxo‘jayev futzal bo‘yicha milliy terma jamoamizning Argentina bilan o‘tgan ikkita o‘rtoqlik uchrashuvlaridan so‘ng fikr bildirdi.

"O‘zbekiston — Argentina futzal uchrashuvlari har kungi og‘ir ish kunlaridan keyin o‘zgacha zavq ulashdi. Buning uchun jamoa a’zolariga va mazkur uchrashuvni tashkil etgan O‘FA vakillariga tashakkur.

Futzalni rivojlantirish qimmatga tushmaydi. Futzalni istalgan maktab sport zalida o‘ynash mumkin. Uni hattoki maktab darsliklariga kiritish orqali juda katta o‘sishga erishsa bo‘ladi. Va umuman futzal o‘ynab katta bo‘lgan yigit katta futbolda texnika va boshlang‘ich tezlik borasida qolganlardan yaqqol ajralib turadi. Inyesta yoki Ronaldinyodagi texnikani futzal mahsuli deb bilaman IMHO.

E’tibor qilayotgan bo‘lsangiz, futzal termamiz birinchi bo‘lib Osiyoning eng yaxshi jamoasi Eron bilan o‘ynaydi. Keyin Afrikaning eng yaxshi jamoasi Marokash bilan. Kecha esa jahonning eng yaxshisi Argentina bilan.

Bu kabi o‘yinlar qancha ko‘p bo‘lsa, futzalchilarda o‘ziga bo‘lgan ishonch shuncha ortib boradi. Oddiy misol: Argentina bilan birinchi uchrashuvda futzalchilar jahon chempioniga qarshi o‘ynayotganliklarini his qilib turishdi.

Ikkinchi o‘yinda esa har qanday raqib bilan bellashish mumkin ekanligini ongli ravishda tushunib zalga chiqishdi. Menimcha, buning katta farqi bor va bu albatta yaxshilikka xizmat qiladi", deb yozadi mutaxassis o‘zining telegram kanalida.