Ayni paytda o‘z o‘quv – mashg‘ulot yig‘inini Turkiyada olib borayotgan “Navbahor” mazkur mamlakatdagi yig‘in doirasidagi ilk o‘rtoqlik bahsini 6 fevral kuni Qozog‘iston Premyer-ligasi vakili “Ordabasi” (Chimkent) jamoasiga qarshi olib bordi.

Belek shahrida bo‘lib o‘tgan mazkur o‘yinda “lochinlar” ustozi No‘’mon Hasanov maydonga quyidagi futbolchilarni tushirdi:

O‘tkir Yusupov, Azimjon Ahmedov, Mirzohid G‘ofurov, Davron Hoshimov, Igor Golban, Ivan Solovyov, Islom Isoqjonov, Marko Putinkanin, Bahrom Abdurahimov, Quvondiq Ro‘ziyev, Zabihillo O‘rinboyev.
Zaxiradan maydonga tushganlar: Nikola Tasich, Abbos G‘ulomov, Sherzod G‘ulomjonov, Farhod Mirahmatov, Sardor Telyakov, Shahzod Hamidov, Ilhom Aliboyev, Husayn Ergashboyev.

Keskin kurashlar ostida o‘tgan uchrashuvning 1-bo‘limida chimkentliklar Mirzad Mexanovichning golidan so‘ng, hisobni ochib, tanaffusga 1:0 hisobidagi g‘alaba bilan chiqib ketishdi.

Ikkinchi bo‘limda “Ordabasi” a’zosi Sergey Xijnichenko  jamoasining navbatdagi hujumini samarali tarzda yakunlab, hisobdagi farqni oshirdi – 2:0.

Shundan so‘ng, o‘yinda burilish yasash maqsadida, jamoamiz a’zolari hujum sur’atini oshirishdi. Bu esa navbatdagi hujum paytida o‘z samarasini berib, chimkentliklar o‘z jarima maydonchalari ichida o‘yin qoidasini buzishdi.

Natijada uchrashuv bosh hakami “Ordabasi” darvozasiga 11 metrli jarima zarbasi belgiladi. Penaltini zaxiradan maydonga tushirilgan Sardor Telyakov aniq amalga oshirib, hisobdagi farqni qisqartirdi – 2:1.

“Lochinlar” o‘yin so‘nggiga qadar, muvozanatni tiklashga harakat qilishdi. Ammo hujumlar o‘z yakuniga yetmadi. Natijada mazkur uchrashuvda chimkentliklar 2:1 hisobida g‘alaba qozonishdi.

Ta’kidlash joizki, ushbu bahsda "Navbahor" murabbiylari futbolchilarning jismoniy holatlarini sinovdan o‘tkazib olishdi.