Ikki hafta mobaynida Turkiyaning Antaliya shahrida o‘quv-mashg‘ulot yig‘inini o‘tkazgan “Qizilqum” futbolchilari yig‘in doirasida so‘nggi nazorat uchrashuvini g‘alaba bilan tugatishdi.

Navoiyliklarning bu galgi raqibi Gruziyaning “Dila” (Gori) klubi bo‘ldi.
Gori shahri sharafini himoya qiluvchi klub 70 yillik tarixga ega bo‘lib, 2015 yilda mamlakat chempioni, 2012 yildi Gruziya kubogini qo‘lga kiritgan.

Bellashuv murosasiz kechdi. Tajriba bobida anchagina ustun bo‘lgan gruziyalik futbolchilar asosan to‘p nazoratini saqlash orqali o‘yin tashkil etishga urinishdi. Ikkinchi bo‘limni vakillarimiz ancha tajovuzkor boshlashdi. Bir  vaziyatda Giorgi Kuxianidzening zarbasi darvoza ustuniga tegib qaytdi. Uchrashuv tugashiga o‘n daqiqa qolganida vakillarimiz o‘yin taqdirini hal qiluvchi golni kiritishdi.  Aniqrog‘i, jamoamizning gruziyalik legionerlari o‘z vatandoshlariga qarshi kechgan bahsda g‘alabani o‘zlari tomonga og‘dirib olishdi. Mate Vasadzening ajoyib to‘p uzatishidan keyin Elguja Grigalashvili raqib posboni bilan birga bir vaziyatga chiqib bordi va uni qiyinchiliksiz dog‘da qoldirdi -1:0.

Shu tariqa “Qizilqum” Turkiyadagi o‘quv-mashg‘ulot yig‘iniga yakun yasadi. Yig‘in davomida futbolchilarmiz oltita nazorat uchrashuvini o‘tkazishib, 4 ta g‘alaba, 1 durang va 1 mag‘lubiyat qayd etishdi.

Jamoamiz a’zolari  12 fevral, juma kuni yurtimizga qaytishadi.

Nazorat uchrashuvi. 11.02.2021.
“Qizilqum”   - “Dela” (Gruziya) 1:0.
Turkiya. Antaliya. “Asteriya” futbol markazi.
Gol: Elguja Grigalashvili (80).
“Qizilqum”: Ignatiy Nesterov - Fayzulla Qambarov (Oleg Tolmasov, 46), Muhsin Ubaydullayev, Sheral Jo‘rayev, Salim Mustafoyev – Erkin Boydullayev, Oybek Qilichev, Jamshid Hasanov (Behruz Sa’dilloyev, 75), Giorgi Kuxianidze, Elguja Grigalashvili – Mate Vasadze.