Икки ҳафта мобайнида Туркиянинг Анталия шаҳрида ўқув-машғулот йиғинини ўтказган “Қизилқум” футболчилари йиғин доирасида сўнгги назорат учрашувини ғалаба билан тугатишди.

Навоийликларнинг бу галги рақиби Грузиянинг “Дила” (Гори) клуби бўлди.
Гори шаҳри шарафини ҳимоя қилувчи клуб 70 йиллик тарихга эга бўлиб, 2015 йилда мамлакат чемпиони, 2012 йилди Грузия кубогини қўлга киритган.

Беллашув муросасиз кечди. Тажриба бобида анчагина устун бўлган грузиялик футболчилар асосан тўп назоратини сақлаш орқали ўйин ташкил этишга уринишди. Иккинчи бўлимни вакилларимиз анча тажовузкор бошлашди. Бир  вазиятда Гиорги Кухианидзенинг зарбаси дарвоза устунига тегиб қайтди. Учрашув тугашига ўн дақиқа қолганида вакилларимиз ўйин тақдирини ҳал қилувчи голни киритишди.  Аниқроғи, жамоамизнинг грузиялик легионерлари ўз ватандошларига қарши кечган баҳсда ғалабани ўзлари томонга оғдириб олишди. Мате Вацадзенинг ажойиб тўп узатишидан кейин Элгужа Григалашвили рақиб посбони билан бирга бир вазиятга чиқиб борди ва уни қийинчиликсиз доғда қолдирди -1:0.

Шу тариқа “Қизилқум” Туркиядаги ўқув-машғулот йиғинига якун ясади. Йиғин давомида футболчилармиз олтита назорат учрашувини ўтказишиб, 4 та ғалаба, 1 дуранг ва 1 мағлубият қайд этишди.

Жамоамиз аъзолари  12 февраль, жума куни юртимизга қайтишади.

Назорат учрашуви. 11.02.2021.
“Қизилқум”   - “Дела” (Грузия) 1:0.
Туркия. Анталия. “Астерия” футбол маркази.
Гол: Элгужа Григалашвили (80).
“Қизилқум”: Игнатий Нестеров - Файзулла Қамбаров (Олег Толмасов, 46), Муҳсин Убайдуллаев, Шерал Жўраев, Салим Мустафоев – Эркин Бойдуллаев, Ойбек Қиличев, Жамшид Ҳасанов (Беҳруз Саъдиллоев, 75), Гиорги Кухианидзе, Элгужа Григалашвили – Матэ Вацадзе.