«Bavariya» himoyachisi David Alaba bugun jamoadan ketishini e’lon qildi.

«Men mavsum yakunlanganidan so‘ng «Bavariya»dan ketishga va o‘zimni yangi joyda sinab ko‘rishga qaror qildim. Bu oson qaror bo‘lmadi. Men 13 yil davomida «Bavariya» futbolkasida o‘ynadim. Men uchun klub katta ahamiyatga ega», – dedi Alaba.

Alaba 2008 yilda «Bavariya» akademiyasiga qo‘shilgan edi va 2010 yilda asosiy jamoada debyut qildi.

Avvalroq insayder Fabrisio Romano futbolchi «Real»ga o‘tish borasida kelishuvga erishganini ma’lum qilgan edi. Tomonlar yanvar oyi boshida muzokara o‘tkazishdi va og‘zaki kelishuvga erishishdi. David madridliklar bilan 2025 yilning yoziga qadar shartnoma imzolaydi.

Ma’lumotlarga qaraganda, «Chelsi», «Liverpul» va bir qator klublar Davidni o‘z saflariga chorlashyapti, ammo Alaba faoliyatini «Real»da davom ettirishni istamoqda.

Alaba joriy mavsumda Bundesliga doirasida 20ta o‘yinda maydonga tushib, 2ta gol urdi. Uning myunxenliklar bilan shartnomasi 2021 yilning 13 iyun kuni yakuniga yetadi.