Shu kabi savolni ko‘rganimda yaxshi ham hamma narsani hal qilish shu savol egasiga qolmagan, degan fikr keladi. Chunki bunday savollarni har bir kasb yoki har qanday holatga nisbatan qo‘llab ko‘rish mumkin. Bu shunchaki vaqt yo‘qotishdan boshqa narsa emas, bu absurd.

FIFA degan tashkilot bor, ayollar futbolini to‘la qo‘llab-quvvatlaydi. Sen uning a’zosimisan, demak ayollar futbolini rivojlantirishingni talab qilaveradi. Agar ayollar futboli senga yoqmasa, uni ignor qilishing va albatta o‘z ishingda davom etishing mumkin. Uning kerak yoki yo‘qligini har safar birdek muhokama qilaverish ortiqcha chaynalishdan boshqa narsa emas. Bu siz-u bizga yarashmaydi.

Biz erkin insonlarmiz. Ahli ayollarimiz va qizlarimiz qanday sharoitlarga ega bo‘lishi va umuman qanday bo‘lishi asosan o‘zimizga bog‘liq. Biz ularning istaklari, ularning dunyoqarashi va ularning fikrlari bilan qiziqishimiz to‘g‘riroq bo‘ladi. Ularni kuchli erkaklargina eshita va tushuna oladi.

Biz ayollar futbolini rivojlantirishning yangi bosqichidamiz. Shu yil U-16 va U-14 jamoalari ham tashkil topadi. Yaqin kelajakda BO‘SMlarda iqtidorli yosh qizlar to‘p tepish imkoniyatiga ega bo‘lishini rejalashtirganmiz. Futboli rivojlangan mamlakatlarda yigit va qizlar 14 yoshgacha bir jamoa safida futbol sir-asrorlarini o‘rganadi.  

Qadrli o‘quvchim, biror narsa sizga yoqmasa, bu uning yo‘q bo‘lishi lozimligini bildirmaydi. Biz ayollar futbolini qo‘llab-quvvatlashda, ularning dardi va rejalarini eshitishda, ularga qo‘limizdan kelganicha ko‘mak berishda davom etamiz. Iltimos, butunroq bo‘laylik.