Anvar Berdiyev bugundan boshlab jamoamizning «Buxoro» klubi bosh murabbiyi Davron Fayziyevga yordamchi murabbiy sifatida ish boshladi. Anvar Berdiyev shu kunga qadar «Istiqlol» jamoasida faoliyat olib borgan. U klub matbuot xizmatiga qisqacha intervyu berdi.

«Buxoro»dan tushgan taklif haqida

— «Buxoro» rahbariyati meni bosh murabbiy Davron aka Fayziyevga yordamchi murabbiy sifatida ishlash taklifi bilan chiqishdi, jamoada jiddiy maqsadlar qo‘yilgani, ya’ni yangi mavsumda superligada ishtirok etishni vazifa qilib olgani, o‘ziga jalb etdi.

Keyin, tug‘ilib o‘sgan viloyatimga yaqinligi ham qaror qabul qilishimda muhim rol o‘ynadi. To‘g‘risi, hozirda otamning ozgina toblari yo‘q, u kishiga yaqin bo‘lishim farzand sifatida zarur edi. Asosiysi ish bilan ham taminlandim.

Men bu takliflarni yaxshilab o‘ylab ko‘rib, Davron aka bilan ishlashga qaror qildim. Nasib qilsa, o‘z oldimizga qo‘yilgan vazifalarni birgalikda bajaramiz.

«Buxoro» jamoasi haqida

— Jamoa Farg‘onada bo‘lib o‘tgan hokim kubogida qatnashdi, mening sobiq jamoam bilan ham to‘qnash kelishdi. Jamoa yaxshi shakllangan, ko‘pchiligi superliga havosidan bahramand bo‘lgan o‘yinchilar. Alloh nasib qilgan bo‘lsa, ushbu tarkib bilan o‘z oldimizga qo‘yilgan vazifalarni bajara olishimizga ishonaman.

Jamoa ishqibozlariga murojaat

— Futbol muxlislar uchun o‘ynaladi, bizning asosiy maqsadimiz ham jamoa muxlislarini kayfiyatini ko‘tarish, ularga olam olam quvonch bag‘ishlash. "Buxoro" muxlislari xaqida men yaxshi taassurotlarga egaman. Oynai jahon orqali ko‘rganman va qolaversa futbolchilik davrimda ham ko‘p bora "Buxoro" stadioniga kelib to‘p surish nasib etgan. O‘sha vaqtlar stadionda joy yetmay muxlislar tashqarida qolib ketgan paytlarga ham guvoh bo‘lganmiz. Judayam talabchan vafodor muxlislar deb bemalol ayta olaman. Maqsadimiz yana o‘sha muhitni qaytarish. Jamoz muxlislariga avvalam bor sog‘liq va oilaviy farovonlik tilayman.