Xabaringiz bor, joriy mavsumning ilk bahsini Namanganning “Navbahor” klubi o‘z maydonida Jizzaxning “So‘g‘diyona” jamoasiga qarshi o‘tkazadi. Mazkur o‘yin uchun chiqarilgan chiptalar bugundan sotuvga chiqdi.   

Ishqibozlar 4, 5, 6, 7, 8, 9, 14, 15, 16, 17, 18 va 19-sektorlar uchun 15 ming,
3, 10, 11, 12, 13 hamda 20-sektorlarga 20 ming so‘m,
2 va 21-sektorlar uchun esa 30 ming so‘mdan chipta xarid qilishlari mumkin.

“Navbahor”–“So‘g‘diyona” klublari o‘rtasidagi uchrashuvdan oldin viloyatimizning taniqli xonandalari tomoshabinlarga o‘zlarining dilrabo kuy-qo‘shiqlari bilan zavq ulashishadi.

Namanganliklar joriy mavsumda o‘z oldiga yuksak maqsadlarni qo‘yganligi bois, ushbu o‘yinning keskin kurashlar ostida o‘tishi ehtimoli yuqori.

Bundan tashqari, “lochinlar” o‘z maydonlarida bu yilgi mavsumdagi ilk uchrashuvni o‘tkazishadi hamda g‘alaba qozonib, muxlislarga quvonch ulashishga harakat qilishadi.  

Chiptalar bugundan boshlab, Namangan shahridagi “Markaziy” o‘yingoh kassalarida sotilmoqda. Chiptalar miqdori cheklangan. Ularni tezroq xarid qilishga shoshiling!

Karantin qoidalariga amal qilgan holda, barcha muxlislar stadionga tibbiy niqoblarda kelishlari shart. Tibbiy niqob taqish bilan nafaqat o‘zingiz, balki, o‘z yaqinlaringiz hamda atrofingizdagilarning ham sog‘liklarini asragan bo‘lasiz. Tibbiy niqob taqmagan muxlislar stadionga kiritilmaydi.    

“Navbahor” – “So‘g‘diyona” o‘yini 9 mart, seshanba kuni soat 18:30 da start oladi.