Хабарингиз бор, жорий мавсумнинг илк баҳсини Наманганнинг “Навбаҳор” клуби ўз майдонида Жиззахнинг “Сўғдиёна” жамоасига қарши ўтказади. Мазкур ўйин учун чиқарилган чипталар бугундан сотувга чиқди.   

Ишқибозлар 4, 5, 6, 7, 8, 9, 14, 15, 16, 17, 18 ва 19-секторлар учун 15 минг,
3, 10, 11, 12, 13 ҳамда 20-секторларга 20 минг сўм,
2 ва 21-секторлар учун эса 30 минг сўмдан чипта харид қилишлари мумкин.

“Навбаҳор”–“Сўғдиёна” клублари ўртасидаги учрашувдан олдин вилоятимизнинг таниқли хонандалари томошабинларга ўзларининг дилрабо куй-қўшиқлари билан завқ улашишади.

Наманганликлар жорий мавсумда ўз олдига юксак мақсадларни қўйганлиги боис, ушбу ўйиннинг кескин курашлар остида ўтиши эҳтимоли юқори.

Бундан ташқари, “лочинлар” ўз майдонларида бу йилги мавсумдаги илк учрашувни ўтказишади ҳамда ғалаба қозониб, мухлисларга қувонч улашишга ҳаракат қилишади.  

Чипталар бугундан бошлаб, Наманган шаҳридаги “Марказий” ўйингоҳ кассаларида сотилмоқда. Чипталар миқдори чекланган. Уларни тезроқ харид қилишга шошилинг!

Карантин қоидаларига амал қилган ҳолда, барча мухлислар стадионга тиббий ниқобларда келишлари шарт. Тиббий ниқоб тақиш билан нафақат ўзингиз, балки, ўз яқинларингиз ҳамда атрофингиздагиларнинг ҳам соғликларини асраган бўласиз. Тиббий ниқоб тақмаган мухлислар стадионга киритилмайди.    

“Навбаҳор” – “Сўғдиёна” ўйини 9 март, сешанба куни соат 18:30 да старт олади.