Superliganing 1-turi doirasida bo‘lib o‘tgan "Navbahor" - "So‘g‘diyona" uchrashuvidan so‘ng o‘tkazilgan matbuot anjumanida dastlab mehmonlar bosh murabbiyi Ulug‘bek Baqoyev jurnalistlar savollariga javob berdi.

"Namangan men uchun juda qadrli shahar. Bu yerda faoliyatimning katta qismini o‘tkazganman. O‘yin haqida to‘xtaladigan bo‘lsam, "Navbahor"ning kuchli jamoa ekanligini bilardik. Muxlislaringiz ajoyib. Rostini aytsam, yopiq o‘yin ko‘rsatishga majbur bo‘ldik. Namanganliklarga ham omad tilayman.

Milan Mitrovich nimaga maydonga tushmadi? Uning farzandi kasal bo‘lib qoldi. Insoniylik faktori sabab unga javob berdik. Milan Mitrovichda qaytish imkoniyati bo‘lmasa, darvozabon olamiz.

"Navbahor" qanotlardan yaxshi o‘ynaydi. Ularda yaxshi imkoniyatlar vujudga keldi. Futbolda kim gol ursa, o‘sha g‘alaba qozonadi. Bugungi o‘yinga hurmat yuzasidan munosabatda bo‘ldik.

Har bir o‘yinga finaldek munosabatda bo‘lamiz. Yakunda nima bo‘lishini vaqt ko‘rsatadi.

"Navbahor" ustidan to‘liq ustunlikka erishdik deyolmayman. Mezbonlar o‘yinning katta qismida ustunlikka erishishdi.

Mavsumoldi tayyorgarlik jarayonini yopiq tarzda o‘tkazdik. Jurnalistlar nigohidan chetda yurdik", — dedi Baqoyev.