Суперлиганинг 1-тури доирасида бўлиб ўтган "Навбаҳор" - "Сўғдиёна" учрашувидан сўнг ўтказилган матбуот анжуманида дастлаб меҳмонлар бош мураббийи Улуғбек Бақоев журналистлар саволларига жавоб берди.

"Наманган мен учун жуда қадрли шаҳар. Бу ерда фаолиятимнинг катта қисмини ўтказганман. Ўйин ҳақида тўхталадиган бўлсам, "Навбаҳор"нинг кучли жамоа эканлигини билардик. Мухлисларингиз ажойиб. Ростини айтсам, ёпиқ ўйин кўрсатишга мажбур бўлдик. Наманганликларга ҳам омад тилайман.

Милан Митрович нимага майдонга тушмади? Унинг фарзанди касал бўлиб қолди. Инсонийлик фактори сабаб унга жавоб бердик. Милан Митровичда қайтиш имконияти бўлмаса, дарвозабон оламиз.

"Навбаҳор" қанотлардан яхши ўйнайди. Уларда яхши имкониятлар вужудга келди. Футболда ким гол урса, ўша ғалаба қозонади. Бугунги ўйинга ҳурмат юзасидан муносабатда бўлдик.

Ҳар бир ўйинга финалдек муносабатда бўламиз. Якунда нима бўлишини вақт кўрсатади.

"Навбаҳор" устидан тўлиқ устунликка эришдик деёлмайман. Мезбонлар ўйиннинг катта қисмида устунликка эришишди.

Мавсумолди тайёргарлик жараёнини ёпиқ тарзда ўтказдик. Журналистлар нигоҳидан четда юрдик", — деди Бақоев.