Superliganing 1-turi doirasida bo‘lib o‘tgan "Navbahor" - "So‘g‘diyona" uchrashuvidan so‘ng o‘tkazilgan matbuot anjumanining ikkinchi qismida mezbonlar bosh murabbiyi No‘’mon Hasanov qatnashdi.

"O‘yin boshida nazoratni qo‘lga olgandik. Gol o‘tkazib yuborganimizdan keyin yigitlar sarosimaga tushib qolishdi, shoshib qolishdi. Tanaffusda tushuntirdik, qo‘rqmay o‘ynashlari kerakligini aytdik. Muxlislarni xafa qilganimiz uchun jamoa nomidan uzr so‘raymiz. Bugun bizning kunimiz emas ekan.

Zabihillo O‘rinboyev mashg‘ulotda jarohat olgandi, shunga maydonga tushmadi.

Azim Ahmedovning himoyadagi o‘yinlari kuchliroq ko‘ringani uchun uni himoyaga qo‘ymoqdaman.

Quvondiq ochiq turgan o‘yinchiga to‘pni oshirmay, to‘pni o‘zida uzoq saqlab qolgani uchun uni almashtirishga majbur bo‘ldim.

Serbiyalik legionerlarimiz hali o‘z o‘yinini ko‘rsatadi. Bugun ko‘pchilik qatori ularning ham o‘yini qovushmadi. Yo‘q joyda ko‘p to‘p yo‘qotdik, Hoshimov va Golban ham ko‘p xatoga yo‘l qo‘yishdi. Xavfli vaziyatlar yaratdik, ularni golga aylantirolmaganimizdan keyin gol o‘tkazib yubordik. Shundan keyin yigitlar shoshilishdi.

Avvalambor, vaziyatlardan unumli foydalanmadik. Birinchi golni biz urganimizda o‘yin boshqacha kechardi. O‘yinning dastlabki qismida bir nechta vaziyatlar yaratgandik. Ulardan foydalana olmaganimiz pand berdi. Shu narsalar "Navbahor" o‘yini qovushmaganiga sabab bo‘ldi.

Bizda doim uch nafar hujumchi o‘ynaydi, Shohruh tushdi, Islom tushdi. Lekin urinishlarimiz foyda bermadi. Ikkinchi golni qo‘yvorganimizda bundan ham yomon bo‘lishi mumkin edi. Tavakkal qilolmasdik. Ko‘rdingiz, Golban ham o‘yin oxirida oldinga o‘tdi.

Panshanbening o‘yini menga yoqadi. Maydonni yaxshi ko‘radi, yomon o‘ynamadi, shuning uchun uni yaxshi legioner deb hisoblayman. U jamoa o‘yinini buzmaydigan futbolchi", — dedi No‘’mon Hasanov.