Sportchilarimizni Tokio-2020 Olimpiya o‘yinlarida tayyorlash bo‘yicha har bir atletimizga alohida e’tibor qaratilmoqda. Bu borada o‘zbek va jahon sporti afsonasi Oksana Chusovitinaning ham Olimpiadaga munosib tayyorlanishi muhimdir. Bugun O‘zbekiston Milliy olimpiya qo‘mitasida sportchimizni Tokio Olimpiadasiga individual tayyorgarlik ko‘rishi masalalari muhokama qilindi. Unda MOQ raisi Rustam Shoabdurahmonov, MOQ Bosh kotibi Oybek Kasimov, MOQ raisi o‘rinbosari Sherzod Tashmatov, O‘zbekiston gimnastika federasiyasi raisi vazifasini bajaruvchi Ruslan Mustayev, Tokio-2020 litsenziati Oksana Chusovitina va u bilan hamkorlikda ishlashi kutilayotgan germaniyalik mutaxassis Diter Kox ishtirok etishdi.

Tadbirda MOQ raisi Tokio Olimpiadasiga tayyorgarlik bo‘yicha o‘z fikrlarini bildirib o‘tdi.

“Tokio Olimpiadasiga tayyorgarlikka shaxsan Prezidentimiz bosh-qosh bo‘lib turibdilar. Hukumatimiz bu boradagi barcha masalalarimizni ijobiy hal qilib bergan. Katta tajribaga ega xorijlik murabbiylar bilan ishlash biz uchun qiziqarli. Oksanadan umidimiz katta. Sportchimiz o‘zining so‘nggi Olimpiadasini medal bilan yakunlashiga tilakdoshmiz”, – dedi Rustam Shoabdurahmonov.

Diter Kox sport gimnastikasi bo‘yicha ulkan tajribaga ega bo‘lgan murabbiy hisoblanadi. Uning qo‘l ostida Germaniya va Buyuk Britaniya jamoalari turli yillarda jahon chempionati va Olimpiya o‘yinlariga tayyorlangan. Kelishuvga ko‘ra, Kox sportchimizning shaxsiy murabbiyi bo‘ladi va Tokio Olimpiadasiga Chusovitinani o‘zi tayyorlaydi. Kelishuv Olimpiya o‘yinlari yakuniga qadar amal qiladi.