Osiyo kubogi saralash bosqichi bellashuvlariga hozirlik ko‘rayotgan U20 O‘zbekiston ayollar terma jamoasi uchun Olmaliq shahrida o‘quv-mashg‘ulot yig‘ini tashkil etiladi.
Mazkur terma jamoamizning tayyorgarlik dasturidan o‘rin olgan navbatdagi mashg‘ulotlar 22-29 mart kunlari «OKMK» sport majmuasida bo‘lib o‘tadi.
Rustam Aripov faoliyatini «Surxon» klubida davom ettirayotganligi sababli, bosh murabbiy lavozimiga Islom Xanjariyev tayinlandi.
Ushbu o‘quv-mashg‘ulot davomida U20 O‘zbekiston ayollar terma jamoasi «Lokomotiv-W» hamda «AGMK-W» vakillariga qarshi nazorat uchrashuvi o‘tkazadi.
Avval xabar berganimizdek, 2022 yili bo‘lib o‘tadigan ayollar o‘rtasidagi U20 Osiyo chempionati saralash bahslarining dastlabki bosqichi 14-22 avgust, ikkinchi bosqich uchrashuvlari esa 3-7 noyabr o‘tkaziladi. Turnirning qur’a tashlash jarayonida U20 O‘zbekiston ayollar terma jamoasi 1-savatchadan o‘rin oladi.
Ma’lumot o‘rnida, O‘zbekiston futbol assosiasiyasi 2022 yilgi U20 Osiyo kubogi final bosqichini yurtimiz maydonlarida o‘tkazish maqsadida OFKga murojaat xati yo‘llagan. Chempionat mezboni 2021 yil aprel oyida e’lon qilinishi rejalashtirilgan.
