Yevropa ligasida nimchorak final bosqichi o‘yinlari yakunlanib, chorak finalga chiqqan jamoalar aniq bo‘ldi. UYEFA bugun musobaqaning chorak final va yarim final bosqichiga qur’a tashlash marosimini o‘tkazadi. Tadbir haqida muhim ma’lumotlar bilan tanishtirib o‘tamiz.

Qachon va qayerda?
Qur’a tashlash marosimi 19 mart, juma kuni UYEFA qarorgohi joylashgan Shveysariyaning Nyon shahrida bo‘lib o‘tadi. Tadbir Toshkent vaqti bilan 17:00da boshlanadi (eslatib o‘tamiz, soat 16:00da YECHL qur’asi bo‘lib o‘tadi).

Ishtirokchi klublar

"Arsenal" (Angliya)
"Ayaks" (Niderlandiya)
"Vilyareal" (Ispaniya)
"Granada" (Ispaniya)
"Dinamo" Zagreb (Xorvatiya)
"Manchester Yunayted" (Angliya)
"Roma" (Italiya)
"Slaviya" (Chexiya)

Qur’a mexanizmi
Qur’a "ko‘r-ko‘rona" tamoyili asosida o‘tkaziladi. Ya’ni har qanday klub har qanday jamoa bilan to‘qnash kelishi mumkin. Jamoalar savatchalarga ajratilmaydi. Hech qanday cheklov yo‘q. Qur’ada nomi birinchi chiqqan jamoa 2-jamoa bilan juftlik hosil qiladi va dastlabki o‘yinni o‘z uyidagi o‘tkazadi.

Yarim final qur’sida esa 1dan 4gacha bo‘lgan raqamlar tortiladi va juftliklar aniq bo‘ldi. Shuningdek, finalda nominal mezbon nomini aniqlash uchun ham qur’a tashlanadi.

Musobaqa taqvimi
Yevropa ligasining chorak final, yarim final va final o‘yinlari quyidagi sanalarga belgilangan:

Chorak final
Dastlabki o‘yinlar: 8 aprel
Javob o‘yinlari: 15 aprel

Yarim final
Dastlabki o‘yinlar: 29 aprel
Javob o‘yinlari: 6 may

Final
26 may ("Arena Gdansk", Polsha)