Superliganing 3-turidan o‘rin olgan «Bunyodkor» - «Andijon» (3:1) uchrashuvidan keyin o‘tkazilgan matbuot anjumanining birinchi qismida mehmonlar ustozi Otabek G‘ulomxo‘jayev ishtirok etdi.

- O‘yin haqida nima deyishim mumkin? «Bunyodkor»ni g‘alaba bilan tabriklayman! Rejamiz amalga oshmadi. Ba’zi futbolchilarimiz bilan gaplashib olamiz. Chunki ular maydonga tushganidan keyin futbolchiligini esdan chiqarib qo‘ydi. Kimligini aytmayman, «Bunyodkor» akademiyasining tarbiyalanuvchisi bo‘lgan yigitlar bugun maydonga chiqib kimligini isbotlab berish kerak edi. Ba’zi harakatlarini shuni ko‘rsatdiki, maydonda ulardan boshqa hech kim yo‘qdek! Jamoaviy o‘yin ko‘rsatib, o‘zini ko‘rsatsa bo‘lardi. To‘g‘ri, futbolchilar yosh, xato qilgandir, ammo men 18-19 yoshni yosh demagan bo‘lardim. Ertaga uchrashuvni qayta ko‘rib chiqib, tahlil qilamiz.

VAR futbolning mazasi, tomoshabinbopligiga salbiy ta’sir qilmoqda. Xohlardimki «Andijon» ishtirokidagi bahslarda VAR ishlamasa. Sababi, o‘yinda ko‘p to‘xtalishlar yuzaga kelmoqda. Xususan, bugun ham mening hisobim bo‘yicha kamida yetti daqiqa to‘xtalish yuz berdi, lekin hakam uch daqiqa qo‘shdi. Qolaversa, birinchi golda ham to‘p maydon tashqarisiga chiqib ketgandek ko‘rindi. Taxminimcha, VAR ham o‘yinning borishini boshqa tomonga o‘zgartirib yuborishi mumkin.