Суперлиганинг 3-туридан ўрин олган «Бунёдкор» - «Андижон» (3:1) учрашувидан кейин ўтказилган матбуот анжуманининг биринчи қисмида меҳмонлар устози Отабек Ғуломхўжаев иштирок этди.

- Ўйин ҳақида нима дейишим мумкин? «Бунёдкор»ни ғалаба билан табриклайман! Режамиз амалга ошмади. Баъзи футболчиларимиз билан гаплашиб оламиз. Чунки улар майдонга тушганидан кейин футболчилигини эсдан чиқариб қўйди. Кимлигини айтмайман, «Бунёдкор» академиясининг тарбияланувчиси бўлган йигитлар бугун майдонга чиқиб кимлигини исботлаб бериш керак эди. Баъзи ҳаракатларини шуни кўрсатдики, майдонда улардан бошқа ҳеч ким йўқдек! Жамоавий ўйин кўрсатиб, ўзини кўрсатса бўларди. Тўғри, футболчилар ёш, хато қилгандир, аммо мен 18-19 ёшни ёш демаган бўлардим. Эртага учрашувни қайта кўриб чиқиб, таҳлил қиламиз.

VAR футболнинг мазаси, томошабинбоплигига салбий таъсир қилмоқда. Хоҳлардимки «Андижон» иштирокидаги баҳсларда VAR ишламаса. Сабаби, ўйинда кўп тўхталишлар юзага келмоқда. Хусусан, бугун ҳам менинг ҳисобим бўйича камида етти дақиқа тўхталиш юз берди, лекин ҳакам уч дақиқа қўшди. Қолаверса, биринчи голда ҳам тўп майдон ташқарисига чиқиб кетгандек кўринди. Тахминимча, VAR ҳам ўйиннинг боришини бошқа томонга ўзгартириб юбориши мумкин.