Taniqli sport jurnalisti va futbol sharhlovchisi Xayrulla Hamidov o‘z You Tube sahifasida O‘zbekiston - Gana terma jamoalari o‘rtasidagi uchrashuv haqidagi mulohazalari bilan bo‘lishdi:

"Avvalo, barchani Gana ustidan qozonilgan g‘alaba bilan tabriklayman. Garchi ushbu terma jamoa asosiy tarkib bilan kelmagan bo‘lsa ham, o‘yin FIFA reytinglariga kiritilmasa ham va bellashuv umumiy statistikalarda inobatga olinmasa ham, baribir bu o‘yin biz uchun muhim bo‘ldi. Sababi, Gananing shu tarkibi ham ko‘plab Osiyo jamoalaridan kuchli va ular bizning muammolarimizni ochib tashlay oldi.

Terma jamoamizning dastlabki daqiqalardagi shiddati stadionga bog‘liq. O‘yin Namanganda, “Markaziy” stadionda bo‘lib o‘tdi. Bunday muxlislar qarshisida istalgan jamoa "uchadi". Dastlabki daqiqalardan mana shunday futbol kutgan edik va mana shu narsa bizga gol olib keldi", — dedi Xayrulla Hamidov.