"Neftchi" bosh murabbiyi Ilhom Mo‘minjonov "Yangiyer"ga qarshi o‘yindan so‘ng matbuot anjumanida ishtirok etdi va quyidagicha fikr bildirdi.

"Bugungi g‘alaba bilan jamoamiz yigitlarini tabriklayman. Ular bugun murabbiylar shtabi tomonidan berilgan ko‘rsatmalarni a’lo darajada bajarishdi. Uzoq demasdan Farg‘onadan yetib kelib bizni qo‘llab-quvvatlab turgan muxlislarga g‘alabamizni  bag‘ishlaymiz.

O‘tkan o‘yinda "Olimpik" bilan durang o‘ynadik. Balki o‘yinni ham yirik hisobda yutsak bo‘lardi. Zaxiradan ko‘nglimiz to‘lmagandi. Bugun guvohi bo‘lganlaringdek, zaxira futbolchilari o‘yinni hal qilishdi. Sherzod Karimov ikkita golli uzatma berdi, bugun u maydonda o‘zining har tomonlama mahoratini namoyish etdi. Umuman aytganda bugun asosiy tarkib va zaxiradan o‘yinga qo‘shilgan barcha futbolchilardan ko‘nglim to‘ldi. Bugungi shijoatli o‘yin uchun futbolchilarimizga rahmat aytaman.

Bugungi  o‘yin haqida murabbiylar shtabi bilan tahlil qilib chiqqandik. "Yangiyer" Samarqandda ham agressiv o‘yin ko‘rsatgan. "Yangiyer" yaxshi jamoa ekan. To‘p nazoratini to‘g‘ri amalga oshirganimiz evaziga g‘alaba qozondik.

Bu yilgi PRO-Ligada o‘ylashimcha barcha jamoalarning imkoniyati bir xil. "Buxoro", "Dinamo" va "Olimpik" jamoalari Superliga yo‘llanmasi uchun jiddiy kurash olib borishsa kerak. Chunki ularda nomdor murabbiylar va sifatli futbolchilar bor. Yana "Oq-tepa" ham yaxshi jamoa, "Xorazm" mana uyda g‘alabaga erishdi. Navbatdagi turda "Istiqlol" bilan o‘ynaymiz, ular ham Superliga uchun kurashishni maqsad qilgan. Bu o‘yinga jiddiy tayyorgarlik ko‘ramiz.

Ulug‘bek Hoshimov va Ruslan Roziyev 18 va 20 yoshli yigitlar. O‘tkan mavsumda bu futbolchilar "Paxtakor" yoshlarida asosiy tarkib o‘yinchilari bo‘lishgan. Bu yigitlarda shijoati zo‘r, bugun  Hoshimov chiroyli gol urdi. Bu yigitlar o‘sishda davom etishsa kelajakda terma jamoada ham o‘ynashadi.

Qizil  kartochkadan so‘ng futbolchilar shoshib qolishdi. Keyinroq o‘yinni to‘laligicha nazoratga olishdi. Shundan so‘ng ikkinchi va uchinchi gollar yuzaga keldi", — dedi Mo‘minjonov.

"Neftchi" matbuot xizmati