Xabaringiz bor, Andijon viloyatining Qo‘rg‘ontepa tumanida «Bunyodkor» akademiyasining filialini ochish bo‘yicha amaliy ishlar boshlangani, klub direktori Ulug‘bek Mirzayev tuman hokimi Elyorbek Nabijonov bilan uchrashib, muzokara o‘tkazgani to‘g‘risida ma’lumot bergan edik.
Kuni kecha Qo‘rg‘ontepa tumani hokimi Elyorbek Zokirovich «Bunyodkor»ga tashrif buyurdi. Tashrifdan maqsad – akademiyamizdagi sharoitlar bilan yaqindan tanishish, turli yoshdagi jamoalarimizning mashg‘ulotini kuzatish, murabbiylar bilan suhbatlashish va albatta Qo‘rg‘ontepada akademiyamiz filialini ochish bo‘yicha yakuniy qaror qabul qilish edi.
Elyorbek Nabijonov «Bunyodkor» futbol klubi direktori Ulug‘bek Mirzayev bilan uchrashdi. Uchrashuv davomida rahbarlar tomonidan Qo‘rg‘ontepada faoliyat boshlashi rejalashtirilayotgan klub akademiyasi filiali borasida batafsil suhbatlashildi. Jumladan, mashg‘ulotlarni o‘tkazish tartibi, mashg‘ulot kunlari, vaqtlari, jismoniy tayyorgarlik va fiziologik o‘sishdagi foydali uslublar, zaruriy sport anjomlari hamda liboslari, shuningdek, boshqa barcha mavjud katta-kichik jihatlarga to‘xtalib o‘tildi.
Qolaversa, Elyorbek Zokirovich «Bunyodkor» stadionini ko‘zdan kechirdi. Muzeyga tashrif buyurib, estalik daftariga dastxat qo‘ydi. Murod Otajonov murabbiyligidagi jamoamizning mashg‘ulotlarini kuzatib, tajribali mutaxassis bilan suhbatlashdi. Aytish kerak, tez orada Qo‘rg‘ontepada «Bunyodkor» akademiyasining filiali o‘z faoliyatini boshlaydi va akademiyamizda faoliyat yuritayotgan murabbiylar Qo‘rg‘ontepaga safar uyushtirib, mahalliy mutaxassislarga kichik amaliy seminar o‘tkazib qaytishadi.
