Хабарингиз бор, Андижон вилоятининг Қўрғонтепа туманида «Бунёдкор» академиясининг филиалини очиш бўйича амалий ишлар бошлангани, клуб директори Улуғбек Мирзаев туман ҳокими Элёрбек Набижонов билан учрашиб, музокара ўтказгани тўғрисида маълумот берган эдик.
Куни кеча Қўрғонтепа тумани ҳокими Элёрбек Зокирович «Бунёдкор»га ташриф буюрди. Ташрифдан мақсад – академиямиздаги шароитлар билан яқиндан танишиш, турли ёшдаги жамоаларимизнинг машғулотини кузатиш, мураббийлар билан суҳбатлашиш ва албатта Қўрғонтепада академиямиз филиалини очиш бўйича якуний қарор қабул қилиш эди.
Элёрбек Набижонов «Бунёдкор» футбол клуби директори Улуғбек Мирзаев билан учрашди. Учрашув давомида раҳбарлар томонидан Қўрғонтепада фаолият бошлаши режалаштирилаётган клуб академияси филиали борасида батафсил суҳбатлашилди. Жумладан, машғулотларни ўтказиш тартиби, машғулот кунлари, вақтлари, жисмоний тайёргарлик ва физиологик ўсишдаги фойдали услублар, зарурий спорт анжомлари ҳамда либослари, шунингдек, бошқа барча мавжуд катта-кичик жиҳатларга тўхталиб ўтилди.
Қолаверса, Элёрбек Зокирович «Бунёдкор» стадионини кўздан кечирди. Музейга ташриф буюриб, эсталик дафтарига дастхат қўйди. Мурод Отажонов мураббийлигидаги жамоамизнинг машғулотларини кузатиб, тажрибали мутахассис билан суҳбатлашди. Айтиш керак, тез орада Қўрғонтепада «Бунёдкор» академиясининг филиали ўз фаолиятини бошлайди ва академиямизда фаолият юритаётган мураббийлар Қўрғонтепага сафар уюштириб, маҳаллий мутахассисларга кичик амалий семинар ўтказиб қайтишади.
