Mashg‘ulot yoki o‘yin mahali futbolchi organizmi uchun energiya manbai – bu uning iftorlik va saharlik mahali yegan taomidir. Shu bois ushbu mahal yetarli suyuqlik va oqsilga boy mahsulotli taomlar qabul qilmog‘i darkor.

Saharlikda qovurilgan, tuzi mo‘l, yog‘li, achchiq, o‘ta shirin yemaklar yemagan ma’qul. Dimlangan taomlar, sut mahsulotlari, tuxum, bo‘tqalar (ovsyanka, pshyonka) maqbul. Iftorlikda salatlar, dukkakli suyuq va me’daga botmaydigan quyuq taomlar, mevalar mumkin.

Og‘izni yopgach darhol uyquga ketmay, bomdod namozidan so‘ng toza havoda biroz sayr qilsangiz maqsadga muvofiq. Uyqu esa yemak oshqozonni tark etib ulgurgan, quyosh tafti ancha kuchaygan, uxlash sunnat qilingan – tush mahaliga qoldirilsa nur ustiga a’lo nur; tiniqib uxlab, kuch yig‘ib, kechki mahal mashg‘ulotga chiqaverasiz (harqalay futbolchilarda bunga sharoit bor). Buyog‘iga og‘iz ochishga yaqin qoladi.

Mashg‘ulot yoki o‘yin mahali og‘iz ochishga to‘g‘ri kelganda suvdan so‘ng ikki dona xurmo va jajji banan yetarli.

Abror Pirriyev.
"Lokomotiv" futbol klubi shifokori.