Машғулот ёки ўйин маҳали футболчи организми учун энергия манбаи – бу унинг ифторлик ва саҳарлик маҳали еган таомидир. Шу боис ушбу маҳал етарли суюқлик ва оқсилга бой маҳсулотли таомлар қабул қилмоғи даркор.
Саҳарликда қовурилган, тузи мўл, ёғли, аччиқ, ўта ширин емаклар емаган маъқул. Димланган таомлар, сут маҳсулотлари, тухум, бўтқалар (овсянка, пшёнка) мақбул. Ифторликда салатлар, дуккакли суюқ ва меъдага ботмайдиган қуюқ таомлар, мевалар мумкин.
Оғизни ёпгач дарҳол уйқуга кетмай, бомдод намозидан сўнг тоза ҳавода бироз сайр қилсангиз мақсадга мувофиқ. Уйқу эса емак ошқозонни тарк этиб улгурган, қуёш тафти анча кучайган, ухлаш суннат қилинган – туш маҳалига қолдирилса нур устига аъло нур; тиниқиб ухлаб, куч йиғиб, кечки маҳал машғулотга чиқаверасиз (ҳарқалай футболчиларда бунга шароит бор). Буёғига оғиз очишга яқин қолади.
Машғулот ёки ўйин маҳали оғиз очишга тўғри келганда сувдан сўнг икки дона хурмо ва жажжи банан етарли.
Аброр Пирриев.
"Локомотив" футбол клуби шифокори.