Madridning «Real» klubi PSJ hujumchisi Killian Mbappe va Dortmundning «Borussiya» klubi to‘purari Erling Xolandni sotib olish bilan tarkibni kuchaytirishga jiddiy kirishmoqda, deya xabar bermoqda As.
Nashrning yozishicha, «qaymoqranglilar» fransuzning transferini shu yil yozda xal etishni istaydi, keyingi maqsad esa norvegiyalik bo‘ladi.
«Real Madrid» Germaniya klubi kelasi mavsumda Chempionlar Ligasiga yo‘l oladi deb umid qilmoqda, chunki agar jamoa YECHLning navbatdagi mavsumida ishtirok etmasa, Xoland klubini o‘zgartirishga qaror qiladi. Bordiyu shunday bo‘lsa, ispanlar Mbappe va Xolanddan birini tanlashi kerak bo‘ladi.
Ma’lumot uchun, joriy mavsumda Mbappe PSJ bilan, barcha turnirlarda 41 uchrashuvda maydonga tushdi. Bu o‘yinlarda uning hisobida 35 goli va 10 golli uzatma mavjud. Xoland esa 36 o‘yinda fransiyalik hamkasbi bilan bir xil miqdordagi gol va golli paslar qayd etishga muvaffaq bo‘lgan.
