Ba’zida ayuhannos soladigan kishilarni tushunish qiyin. Agar sen jurnalist bo‘lsang, maqola yozishdan avval kichik surishtiruv o‘tkazish qiyin emas. Chunki PFL bugun istalgan mavzu yuzasidan ochiq muloqot qilishga tayyor tashkilot.

«Sho‘rtan» klubi faoliyatini to‘xtatishga juda yaqin keldi. Mana shunday vaqtda PFL Samarqand klubiga talab bilan emas, taklif bilan chiqdi. «Dinamo» vaziyatni tushundi va o‘yinni qoldirishga rozi bo‘ldi. Buning uchun Hakim Fuzaylov va «Dinamo» rahbariyatiga faqat rahmat aytishimiz kerak. Buning Pro liga saviyasiga dahli yo‘q. Biz o‘zimizdan avval ishlagan shaxslarning xatolari bilan kurashishga mahkum odamlarmiz.  

"Istiqlol"ning musobaqa bilan xayrlashgani ham PFL aybi emas, bu butun dunyo ligalarida sodir bo‘lishi mumkin bo‘lgan holat. «Dinamo»ning Farg‘onaga borib kelgan harajatlari uchun ham PFL javob bermaydi. Chunki PFL yil avvalida Reglament taqdim etgan va unda biror jamoa musobaqadan chiqib ketsa, qanday holat qo‘llanilishi aniq va tiniq yozilgan. Har bir klub shu Reglamentga rozi bo‘lib, musobaqaga kirishgan.

«Sho‘rtan» 7 yil deganda Igor Kriushenko hamda Vitaliy Vorivonchik pullarini bugun to‘lab berdi. Bir necha kun ichida FIFA klubga nisbatan taqiqni olib tashlaydi. Buning oson kechmaganini faqat shu ish ichida bo‘lganlar juda yaxshi biladi. «Sho‘rtan»ning bugungi tarkibi bir tan bo‘lib, eski yaralarning deyarli hammasiga malham qo‘yib chiqdi.

Nega «Sho‘rtan» klubining shu muammosi yillar davomida hal etilmagan? Nega mana shu ishlar uchun «Sho‘rtan»dan kimdir chiqib javob bermagan? Tezkor jurnalist nega shu masala bo‘yicha surishtiruv o‘tkazmagan? Yillar davomida PFL FIFA talablari masalasida nega ishlamagan? Biz 2 yil ichida FIFA bilan bog‘liq 20 ga yaqin ishni yopmadikmi? Soqov tashkilotni odamlarga maksimal darajada yaqinlashtirmadikmi? Yoki siz bizga hammasi oson deysizmi? Biz futbol ichida ham eskilik sarqitlariga, nohaqliklarga qarshi kurashmay, qo‘l qovushtirib o‘tiribmizmi?

Jangda hech kimga oson bo‘lmaydi. Biz katta yo‘lga chiqqan kichik karvonmiz, niyatimiz xolis. Maqsad uchun yo‘l oson emasligini bilganmiz, o‘zimizdan o‘tayotganlari o‘zimizga ma’lum. Vaqti kelib qilganlarimiz haqida albatta hisob beramiz. Hozir esa yana bir klubimizning yana bir xalqaro muammosi hal bo‘layotganidan oz bo‘lsa-da taskin topamiz.

Ammo mana ko‘rasiz, ertaga boshqa klub legioneri bilan shunday muammo chiqadi va oxirida ayrimlar bizni tanqid qiladi. Futbol qiziq bizda, kimlardir bunda go‘shtning aynigan ekanini dorixonadan ko‘rishdan ham uyalishmaydi.

Diyor Imomxo‘jayev.