UEFA Yevro—2020 musobaqasi doirasidagi ayrim o‘yinlar taqvimida o‘zgarish bo‘lganini ma’lum qildi.

Dublin (Irlandiya) va Bilbao (Ispaniya) shaharlari mezbonlar ro‘yxatidan chiqarilgan. Ulardagi o‘yinlar esa boshqa shaharga bo‘lib berilgan.

Yevro—2020 musobaqasida quyidagi o‘zgarishlar ro‘y berdi:

— Bilbaodagi barcha o‘yinlar Ispaniyaning boshqa shahri Sevilyaga ko‘chirildi;

— Dublinda o‘tkazilishi belgilangan guruh bosqichidagi uchta o‘yin Sankt-Peterburgga (Rossiya) berildi;

— Dublinda o‘tishi kerak bo‘lgan 1/8 final o‘yini Londonga (Angliya) taqdim etildi.

Shu tariqa, Yevro—2020 quyidagi shaharlarda bo‘lib o‘tadi: Rim, Boku, Sankt-Peterburg, Kopengagen, Amsterdam, Buxarest, London, Glazgo, Sevilya, Myunxen, Budapesht.

Yevropa chempionati avvaliga 2020 yilning yozida bo‘lib o‘tishi belgilangandi. Biroq koronavirus pandemiyasi sabab qoldirilgandi.

Musobaqa 11 iyundan 11 iyulga qadar bo‘lib o‘tadi.

Avvalroq UEFA Superliga loyihasini yengishda yordam bergani uchun Yevro—2020 doirasidagi ayrim o‘yinlarni Angliyaga, ayrimlarini esa uchrashuvlarda ko‘proq tomoshabinlar yig‘ish maqsadida Rossiyaga berishi mumkinligi xabar qilingandi.