Qo‘qon – o‘zbek futbolining vatani. Bu shaharda futbolni yaxshi ko‘rishadi. Bugun Qo‘qondagi “Markaziy” stadionida “Qo‘qon-1912” jamoasining rahbarlari, murabbiylar hamda futbolchilar jamoaning ashaddiy , jonkuyar muxlislari bilan uchrashishdi. Uchrashuvdan ko‘zlangan maqsad jamoadagi muhit, so‘nggi o‘yinlardagi qoniqarsiz natijalar haqida ochiqchasiga so‘zlashish edi.
Uchrashuvda dastlab “Qo‘qon-1912” jamoasining prezidenti Baxtiyor aka Tolipov so‘z olib, barchani ramazon oyi va bugungi juma ayyomi bilan tabrikladilar. Jamoa rahbari barcha muxlislarga futbolchilarni har qanday vaziyatda qo‘llab turganliklari uchun minnatdorchilik bildirib, qisqacha stadionda muxlislarning o‘zlarini tutishlari va karantin qoidalariga rioya etish masalasiga to‘xtalib o‘tdilar.
-“Namangandagi tartibsizliklar bizga saboq bo‘lishi lozim. Qo‘qon xalqi o‘zining yuksak madaniyati bilan butun dunyoga namuna bo‘lib kelgan. Futbolchilar sizlarni xursand qilish uchun bor kuch va imkoniyatlarini sarflashmoqda va bundan buyog‘iga yanada qattiqroq ishlashadi. Buning uchun sizlardan jamoamizni chiroyli tarzda qo‘llab-quvvatlab turish lozim bo‘ladi. Qolaversa yurtimizda karantin qoidalari yana kuchaytirildi. Navbatdagi o‘yindan boshlab stadionga albatta niqob bilan kelishlaring hamda oraliq masofani saqlab o‘tirishlaringni iltimos qilaman.
Bugungi uchrashuvga biroz davolanishda bo‘lganligi sababli Baxtiyorjon Ashurmatov yetib kela olmadi. Biz barcha talab istaklaringni bajo keltirishga qo‘limizdan kelgancha harakat qilamiz. Bosh murabbiyimizga ishonamiz, Ashurmatov jamoani qiyin xolatdan olib chiqa oladi va navbatdagi o‘yinlarda yigitlar albatta sizlarni xursand qilishadi”- dedi jumladan B Tolipov.
Shundan so‘ng muxlislar o‘zlarini qiziqtirgan savollar bilan jamoa rahbariga, murabbiylarga yuzlanishdi. Savollarga jamoa rahbari Baxtiyor aka Tolipov hamda katta murabbiy Zohid Nurmatovlar batafsil javob berdilar. Uchrashuv qizg‘in munozaralar va savol-javoblarga boy tarzda bo‘lib o‘tdi.
Jamoamizning yoshi ulug‘ muxlislari yigitlarga oldinda kutib turgan o‘yinlarda omad tilab, bosh murabbiyga esa yaratgandan shifo so‘rab duolar qilishdi.
