O‘zbekiston Kubogining 2-turi doirasida «Turon» ustidan qozonilgan g‘alabadan keyin «Lokomotiv» bosh murabbiyi Mikael Sekeyra o‘z fikrlarini bildirib o‘tdi.

"O‘yinni yaxshi boshlay olmadik. Startda o‘zimizni ko‘rsata olmadik. Dastlabki 15 daqiqalikdan keyin o‘zimizga keldik va o‘yinimiz ochilib ketdi. Bugun o‘yin uslubimizni biroz o‘zgartirdik. Maqsadimiz - Timurxo‘ja Abduxoliqov hamda Marat Bikmayevni yonma-yon o‘ynatish edi. Ular biz mo‘ljallagan pressingni uyushtirishi talab qilingandi. Raqiblar hujumda yaxshi o‘yin ko‘rsata olmagani sababli himoyada to‘pni oldinga tepib yuboraverishdi.

Uchrashuv yakuniga 20 daqiqa qolganida 10 kishi bo‘lib qoldik. Ro‘za oyida raqibdan bir kishi kam bo‘lib o‘ynash oson emas. Shunday bo‘lsada, futbolchilar intilishdi va xarakter ko‘rsata olishdi. Shu orqali ular o‘zlari istagan natijaga erisha olishlarini namoyon qila olishdi va so‘nggi daqiqalarda gol urishga erishishdi. Bu juda qiyin, doim ham o‘xshayvermaydi. Yana bir bor «Lokomotiv» futbolchilarini tabriklayman. Shuningdek, bu g‘alaba shu yerda ishlaydigan barchaga, muxlislarga ham bag‘ishlanadi. Futbolchilar esa fantastik o‘yin namoyish qilib berishdi.

Ramazon oyida 9 kun ichida 3ta o‘yin o‘tkazish, ustiga ustak 16:30da - juda qiyin. Nukusda ham issiq havo bo‘ladi. 3 kundan keyin u yerda o‘yin o‘ynaymiz. U yerda ham yutishga harakat qilamiz. Biroq oson bo‘lmaydi. Oson o‘yinning o‘zi yo‘q. U yerda maydon sun’iy. Biroq har bir futbolchimga ishonaman. Kim maydonga tushadigan bo‘lsa, o‘zining maksimal kuchini namoyish qiladi", - deydi Sekeyra.