AGMK bosh murabbiyi Mirjalol Qosimov Osiyo chempionlar ligasi guruh bosqichi 6-turi doirasida Tojikistonning "Istiqlol" klubiga qarshi bo‘ladigan o‘yin oldidan o‘z fikrini bildirib o‘tdi.

— Biz uchun imkoniyatlar tugagan. Lekin musobaqani chiroyli tarzda yakunlab qo‘yishimiz kerak. OCHLdagi oxirgi o‘yinda muxlislarga chiroyli o‘yin taqdim etib, g‘alaba uchun kurashamiz. AGMK muxlislar va jamoa g‘ururi uchun ham o‘ynaydi. OCHL tugayotgani bilan hayot davom etadi. Bizni ichki chempionatda ham hali uzoq mavsum kutmoqda. Biz ertangi bahsga jiddiy tayyorgarlik ko‘ryapmiz. Ikkala jamoada ikki xil vaziyat. «Istiqlol» bilan o‘yin qiziqarli bo‘ladi.

— «Istiqlol» himoyaviy o‘ynaydi. Ertaga AGMK ham o‘yinni himoyadan quradimi? Ikkinchi savolim, ertaga yosh futbolchilarga imkoniyatlar beriladimi?
— Biz himoyaviy uslubda o‘ynamaymiz. Yo‘qotadigan narsamiz yo‘q. Ertaga «Istiqlol»ning tartibli himoyasini yorib o‘tishga intilamiz. «Istiqlol»ning himoyasi nafaqat biz uchun, balki «Shabab Al-Ahli» va «Al-Hilol»ga ham katta muammo bo‘ldi. Ikkinchi savolga keladigan bo‘lsam, albatta bizda hammaga imkoniyatlar beriladi. O‘tgan o‘yinlarda ham imkoniyatlar berildi.

Sanjar Tursunov: «Biz bo‘lajak o‘yinga 1-tur uchrashuviga qanday tayyorgarlik ko‘rgan bo‘lsak xuddi shu munosabatda taraddud ko‘ryapmiz. Ertaga bizdan murabbiylar va muxlislar faqat g‘alaba kutishadi va biz har doimgidek g‘olib bo‘lish uchun harakat qilamiz».