10 may kuni Superliganing 5-turi doirasidagi qoldirilgan «Turon» – AGMK to‘qnashuvi bo‘lib o‘tdi(0:1). Mazkur bahsda Olmaliqning AGMK jamoasi minimal hisobda g‘alaba qozondi.

O‘yin yakunlangandan so‘ng, «Turon» bosh murabbiy Islom Ismoilov Feysbukdagi sahifasida bugungi o‘yin haqida izoh qoldirdi:

«Biz ham insonmiz! Bizda ham sabrning chegarasi bor. Agar voqealar rivoji shunday davom etsa, butun umrga futboldan ketaman, lekin o‘zim bilan ko‘pchilikni olib ketaman. Bugunmi, ertagami, barchasining javob bor. Allohdan qo‘rqinglar».

E’tiborli jihati shuki, Islom Ismoilov izoh qoldirmasidan oldin bergan intervyusi boshqacha ko‘rinish oldi.

«O‘yinga kelsak, yomon boshlamadik, birinchi bo‘limda to‘liq nazoratni qo‘lga oldik, bir qancha vaziyatlarni yaratdik. Lekin bu – futbol, undan har doim yaxshi o‘ynagan jamoa g‘olib chiqmaydi. Demak, nimanidir noto‘g‘ri qilyapmiz, shu bois mag‘lubiyatga uchradik. Barcha aybni o‘z zimmamga olaman. Futbolchilar bilan gaplashib oldik, 2 kundan keyin bizni yana bir o‘yin kutmoqda. Bu narsa ruhiy holatimizga ta’sir qilmasligi kerak. Vaziyatdan chiqib ketish uchun harakat qilamiz» – degan edi Feysbukdagi sahifasiga izoh qoldirmasdan oldi Islom Ismoilov.

O‘zbek muxlislariga ma’lumki, Islom Ismoilov Superliga 2 turidan o‘rin olgan «So‘g‘diyona» va «Turon» o‘rtasidagi bahs yakuniga yetganidan so‘ng o‘zining haqli e’tirozlarini bildirib o‘tgan edi.