"Sherlar" Superliganing 8-turida Toshkentda "Qo‘qon-1912"ni qabul qilishadi.

Deyarli bir yarim oyga yaqin tanaffusdan keyin Xyuistra shogirdlari yana "Paxtakor" stadionida o‘yin o‘tkazadi. Raqib esa sovrindor o‘rinlar uchun kurashayotgan "Qo‘qon-1912" jamoasi bo‘ladi. Qo‘qonliklar joriy mavsum hozircha safardagi o‘yinlarda mag‘lub bo‘lishmadi va bu uchrashuv intrigasini yanada oshiradi.

Qo‘qonliklar bilan kechadigan bellashuvni diskvalifikasiya sababli Yegor Krimes o‘tkazib yuboradi. Raqibda bunday yo‘qotish mavjud emas.

"Qo‘qon-1912"ga qarshi chempionatlarda o‘tgan 30 bahsning 18tasida "Paxtakor" zafar quchgan. 7 o‘yinda durang qayd etilgan bo‘lsa, 5 marta raqib g‘alaba qozongan. Raqib darvozasini 79 marta ishg‘ol qilgan toshkentliklar 41 gol o‘tkazib yuborishgan.

Toshkentdagi uchrashuvlarning 13tasida "Paxtakor" zafar quchgan bo‘lsa, bittadan to‘qnashuv durang va mehmonlar yutug‘i bilan tugagan. 6 bahsda mezbonlar yirik hisobda zafar quchgan. Uyda 54 to‘p kiritgan "Sherlar" o‘z darvozasidan 18 gol olib chiqishgan. O‘zaro o‘yinlardagi eng yirik natija 2000 yil kuzatilgan. O‘shanda "Paxtakor" 7:1 hisobida g‘alaba qozongan. O‘tgan yili Toshkentda "Paxtakor" 2:1 natijasi bilan muvaffaqiyatga erishgan.

"Paxtakor" va "Qo‘qon-1912" jamoalari o‘rtasidagi uchrashuv 12 may, chorshanba kuni "Paxtakor" stadionida soat 18:50da boshlanadi.