«Jenoa» hujumchisi Eldor Shomurodov A Seriya 36-turi doirasida «Bolonya»ga qarshi kechgan 12-may kungi uchrashuvda (2:0) maydonga tushdi.

WhoScored portali o‘zbekistonlik futbolchining ushbu uchrashuvdagi harakatlarini 7,7 ballga baholagan. Bu genuyaliklar safida Davide Zappakosta (8,7 ball) va Mattia Perindan (8,5) keyingi eng yaxshi natija bo‘ldi. Eldor bahsni asosiy tarkibda boshladi va to‘liq harakat qildi.

Shomurodov uchrashuv davomida 42 marta to‘pga tegindi. Hamyurtimiz daroza tomon 4 bor zarba berdi. Shulardan ikkitasi aniq, ikkitasi esa noaniq ko‘rinish oldi.

Uning 27 uzatmasidan 17 tasi (63%) aniq chiqdi. 25 yoshli futbolchi maydonda 8 marta yakkakurashga kirishib, ularning oltitasida muvaffaqiyat qozondi. Havodagi kurashda 9 urinishning uchtasida yutib chiqdi.

O‘z navbatida, SofaScore portali esa o‘zbekistonlik hujumchining o‘yinini 7,8 ballga loyiq ko‘rdi.

Ma’lumot o‘rnida, Shomurodov A Seriyaning 2020/21-yilgi mavsumida 29 o‘yin o‘tkazib, 5 gol va 1 golli uzatmaga mualliflik qildi.