Yuventus - Inter. Eks-chempion va yangi chempion to‘qnashuvi. Bu qarama-qarshilik ildizi ancha chuqur ketgan. Ular o‘rtasida tarixiy janglar ko‘p bo‘lgan, maydonda va undan tashqarida ham. Inter Yuveni uncha xush ko‘rmaydi desak yumshoq qilib aytgan bo‘lamiz. Bu tuyg‘u Italiyaning boshqa top klublarini ham chetlab o‘tmagan. Tabiiy holat, gegemonlarga nisbatan hamma yerda shunay. Inter dushman qarorgohiga borib uni biryo‘la Chempionlar ligasidan mahrum qilish imkonmyatidan foydalanish uchun bor kuchi bilan harakat qilishi aniq. Buning ustiga kubokdan Interni aynan Yuventus chiqarib yuborgan.
Alohida shaxslar uchun katta o‘yin. Masalan Antonio Konte. Uning futbolchilik davri ham, murabbiylik davri ham bevosita Yuvega bog‘liq. Kelajakda qaytishi mumkinligini esa inkor etib bo‘lmaydi.
Yuventusning holati sizga ma’lum. Qolgan ikkita uchrashuvda g‘alaba qozonsa va raqiblaridan biri qoqilsagina Chempionlar ligasi zonasidan joy oladi. Aks holda... Pirlo haydaladi, yulduzlar ketaman deydi, Ronalduga qiziq bo‘lmay qoladi. Turin super-klubi chuqur inqirozga kirib ketishi mumkin. Chora bitta, mavsum oxirini qutqarish. O‘zini taxtdan yiqitgan chempion Interni yengish. Hamon quvvati borligini isbotlash.
Ko‘rish shart bo‘lgan o‘yin. 21:00 da FUTBOLTV namoyish etadi. Men esa sharhlab boraman.
Davron Fayziyev.
