"Juda ham murakkab o‘yin bo‘ldi. "So‘g‘diyona" juda yaxshi shakllangan jamoa. Tan olish kerak birinchi taymda raqib bizdan ustunlik qildi va himoyadagi xatolarimizdan foydalanishdi. Tezkor gol urganimizga qaramay ketma-ket uchta gol o‘tkazib yubordik.
Ikkinchi taymda vaziyatlar yaratdik, oxirigacha kurashdik, afsuski futbol shunday beshafqat. Ikkinchi taymdagi o‘yinimiz orqali hech bo‘lmasa durangga loyiq edik. Yigitlarimiz oxirgacha kurashishgani uchun muxlislarimiz ularni olqishlab qo‘yishdi.
Asosiy darvozabonimiz Muzaffar Abdullayev jarohat olganidan keyin har o‘yinda turli darvozabonlar tushmoqda. Birinchi davradan keyin Islomjon Abdullayevni qaytarish imkoniyati bor, yoki Asilbek Amonov yil boshida bizning jamoaga kelishi mumkin edi. Biroq uch darvozabon bilan shartnoma tuzib bo‘lgandik. Yozda balki uning variantini yana ko‘rib chiqarmiz.
Bobur Akbarov zaxiraga olinganidan keyin jahli chiqdi? O‘zim ham futbolchi bo‘lganman, birinchi taymda zaxiraga olinish hech kimga yoqmaydi. Lekin 1:3 hisobida yutqazayotgandik va tavakkal qilishimiz kerak edi. O‘zgarishlar o‘zini oqladi, hujumkorlik ortdi, Abduhamidovning o‘zida ikkita vaziyat bo‘lgandi. Bitta yoqmagan jihat bu raqib futbolchilarining maydonga yotib olishlari bo‘ldi, mayli bu vaziyatga to‘xtalib o‘tishni xohlamayman. Mag‘lub bo‘ldik va ayb o‘zimizda.
Andrey Sidorovning potensiali yuqori, lekin so‘nggi yillarda o‘yinida pasayish bo‘ldi. Uni mana shu "chuqurlik"dan olib chiqib ketsak juda yaxshi o‘yinlar namoyish etishi aniq.
FIFA kunlari munosabati bilan taxminan 1 oylik tanaffus bo‘ladi. Bundan unumli foydalanishimiz kerak. Rejalarimizda "Turon" bilan o‘rtoqlik uchrashuvi o‘tkazish bor. Keyingi rejalar tasdiqlangach bu borada alohida xabar beramiz", - deydi Baxtiyor Ashurmatov.
