"Bunyodkor" — "Navbahor" (0:0) o‘yinidan keyin tashkil etiladigan matbuot anjumanining ikkinchi qismida mezbonlar bosh murabbiyi Shuhrat Maqsudov qatnashib, o‘yin haqidagi fikrlarini bildirdi.

"Avvalgi turdagi alamli mag‘lubiyatdan keyin, futbolchilarning ruhiy holatini yaxshilashga harakat qildik. O‘ylashimcha, bugun futbolchilarimiz mazmunli o‘yin ko‘rsatishdi. Bugun omadimiz kelmadi. Shogirdlarimga bugungi o‘yin uchun katta rahmat aytaman. Ular kiyinish xonasida tushkunlikka tushib qolishdi, ularning ruhiyatini ko‘tarishga harakat qildik. Bugungi kunda kim kuchli bo‘lsa, o‘sha maydonga tushadi. Mirjahon Marahmadovning o‘yinidan mamnunman, shuning uchun unga ishonch bildirdim. Bu boshqa futbolchilarga ishonmayman deganim emas, vaqti kelib, hammaga imkoniyat beriladi, — deydi Shuhrat Maqsudov.

— Jamoangiz feyr-pleyga amal qilmayapti, bu sizning ko‘rsatmangizmi yoki futbolchilarning o‘zlari shuni xohlashyaptimi?
— Menimcha, bugungi kunda feyr-pleyga eng ko‘p amal qiladigan jamoa "Bunyodkor" bo‘ladi. Bitta o‘sha birinchi bo‘limda Farrux Ikromov o‘yinni to‘xtatmaganini inobatga olsak, boshqa bunday holat kuzatilmadi.

— Yaxshigina homiyga ega bo‘lganimizda transfer oynasi yopilgandi. Birinchi davrani yakunlab olsak, tarkibga yaxshi futbolchilarni olish niyatimiz bor. Shu jumladan, yoshlar jamoasidan ham.

— "Navbahor"ni "Neftchi"da ishlab yurgan paytimdan juda hurmat qilaman. Namanganda futbolni juda sevishadi. "Bunyodkor" har bir o‘yinga raqibni hurmat qilgan holda chiqadi. Jumladan, "Navbahor"ni ham. Lekin bugungi durang biz uchun mag‘lubiyatga teng bo‘ldi, — deya fikrlarini yakunladi Shuhrat Maqsudov.