"Real", "Yuventus", "Shtutgart" va Germaniya terma jamoasining sobiq yarim himoyachisi Sami Xedira professional futbolchilik faoliyatini yakunlayotganini e’lon qildi.

Endi 34 yoshni qarshilagan Xedira ayni damda "Gerta" klubida top surayapti. Ushbu mavsumda u atigi 8 o‘yin o‘tkazib, 2 golli uzatmani amalga oshirdi.

Xedira 22-may, shanba kuni Bundesliganing 34-tur doirasida "Hoffenxaym"ga qarshi futbolchilik faoliyatidagi so‘nggi o‘yinida maydonga tushadi.

"Xayrlashish vaqti keldi. Hayotni o‘zgartiradigan qarorlarni qabul qilish hech qachon oson emas. Ammo ba’zida siz bunga majbur bo‘lasiz. Shanba kuni men faoliyatimdagi so‘nggi o‘yinimni o‘tkazaman!

Menga eng katta klublarda o‘ynash, ajoyib sovrinlarni yutish va 2014-yilgi Jahon chempionati kubogini qo‘lga kiritganimizdagi tarixiy daqiqalarning bir qismi bo‘lish sharafi menga nasib etdi! Barcha muxlislar, jamoadoshlar, murabbiylar va, albatta, mening oilam va do‘stlarimga rahmat. Endilikda nihoyasiga yetayotgan ushbu sayohatda siz doimo men bilan bo‘lgansiz. Yana ko‘rishamiz!" - deb yozdi Xedira Instagramda.