Yozgi transfer oynasida «Yuventus»ni tark etishi kutilayotgan Krishtianu Ronaldu «Manchester Yunayted»ga qaytishni istamoqda. Bu haqda As xabar tarqatgan.

Manbaning yozishicha, manchesterliklar portugaliyalik hujumchi bilan bog‘lanishgan va uni jamoaga qaytarish masalasida rejalarini aniq tushuntirishgan. 

Qayd etilishicha, «MYU» bosh murabbiyi Ole-Gunnar Sulsher shaxsan Krishtianu Ronaldu bilan gaplashib, jamoa rejalari haqida ma’lumot bergan. 36 yoshli forvard «Manchester Yunayted»ga qaytishga tayyorligini ma’lum qilgan. 

Yozilishicha, Ronaldu «MYU»ga qaytishni hech qachon hozirgidek jiddiy ko‘rib chiqmagan. Futbolchi va uning agenti Jorje Mendesh A Seriya yakunidan keyin Turinda qolish yoki qolmaslik bo‘yicha aniq qarorga kelmoqchi.

Ronaldu «Old Trafford»ga qaytgan taqdirda ikki yillik shartnoma imzolashni, keyin esa futbolchilik faoliyatini «Sporting»da yakunlashni istamoqda.

Ma’lumot uchun, «Yuventus» A Seriya 37-turidan keyin 75 ochko bilan 5-o‘rinda bormoqda. Klub so‘nggi turda safarda «Bolonya»ga qarshi maydonga tushadi.