Ёзги трансфер ойнасида «Ювентус»ни тарк этиши кутилаётган Криштиану Роналду «Манчестер Юнайтед»га қайтишни истамоқда. Бу ҳақда As хабар тарқатган.

Манбанинг ёзишича, манчестерликлар португалиялик ҳужумчи билан боғланишган ва уни жамоага қайтариш масаласида режаларини аниқ тушунтиришган. 

Қайд этилишича, «МЮ» бош мураббийи Оле-Гуннар Сульшер шахсан Криштиану Роналду билан гаплашиб, жамоа режалари ҳақида маълумот берган. 36 ёшли форвард «Манчестер Юнайтед»га қайтишга тайёрлигини маълум қилган. 

Ёзилишича, Роналду «МЮ»га қайтишни ҳеч қачон ҳозиргидек жиддий кўриб чиқмаган. Футболчи ва унинг агенти Жорже Мендеш А Серия якунидан кейин Туринда қолиш ёки қолмаслик бўйича аниқ қарорга келмоқчи.

Роналду «Олд Траффорд»га қайтган тақдирда икки йиллик шартнома имзолашни, кейин эса футболчилик фаолиятини «Спортинг»да якунлашни истамоқда.

Маълумот учун, «Ювентус» А Серия 37-туридан кейин 75 очко билан 5-ўринда бормоқда. Клуб сўнгги турда сафарда «Болонья»га қарши майдонга тушади.