“Tottenxem”dan ketib, sovrinlar uchun kurashadigan kuchli klubga o‘tishni orzu qilayotgan Harri Keyn kelajakdagi maqsadlari bilan o‘rtoqlashdi.
- Men eng zo‘r o‘yinchi bo‘lishni istayotganimni aytishdan qo‘rqmayman. Lionel Messi va Krishtianu Ronaldu darajasiga ko‘tarilishni orzu qilayotganim ham meni cho‘chitmaydi. Asosiy maqsadim har mavsumda 50, 60, 70 ta gol urish. O‘zimga shunaqa mo‘ljal qo‘ydim, - deydi Harri Keyn.
27 yoshli futbolchi “Tottenxem”ning keyingi yillardagi eng yaxshi o‘yinchisi sifatida nom qozongan. Biroq, londonliklar anchadan beri ko‘zga ko‘rinadigan biror sovrin yutgani yo‘q. Harri Keyn esa faoliyatini sovrinsiz yakunlamoqchi emas.
Joriy mavsumda Angliya premyer-ligasida 34 ta uchrashuvda 22 ta gol urgan hujumchiga “Manchester Siti”, “Manchester Yunayted”, Barselona” va “Real” ko‘z tikmoqda. Uning o‘zi Gvardiola qo‘l ostida to‘p tepishni istayapti.
