Pro ligadan Superligaga chiqishni maqsad qilgan «Buxoro» klubi murabbiylar shtabida navbatdagi o‘zgarishlar yuz berdi.

24 may, dushanba kuni «Buxoro» klubi rahbariyati navbatdan tashqari yig‘ilish o‘tkazib, jamoani boshqarib kelayotgan Anvar Berdiyev va Sergey Lebedov singari mutaxassislarni iste’foga chiqargan. «Buxoro» klubining o‘tgan haftada Pro ligadagi asosiy raqobatchisi «Dinamo»ga mag‘lub (1:3) bo‘lishi murabbiylar iste’fosiga sabab bo‘lgan. Hozircha jamoani Suhrob Qobilov boshqarib borishi kutilmoqda.

Anvar Berdiyev va Sergey Lebedov mart oyida Farg‘onaning «Istiqlol» klubini tark etib, «Buxoro» bosh murabbiyi Davron Fayziyevga yordamchi sifatida ish boshlagan edi. May oyi boshida Fayziyev iste’foga chiqarilgach, Berdiyev bosh murabbiy vazifasini bajaruvchi sifatida ishlayotgandi. Biroq oradan uch hafta o‘tib Berdiyev – Lebedov tandemiga ham chiqish eshiklari ko‘rsatilgan.

Avvalroq, 15 may kuni «Buxoro» klubi bosh direktori etib Usmon Toshev tayinlangani, buxorolik taniqli mutaxassis Tojikiston milliy jamoasidagi faoliyatidan keyin ikkinchi davra oldidan klubda faoliyat boshlashi haqida ma’lum qilingandi.

Ma’lumot uchun, «Buxoro» Pro liga 8-turidan keyin 13 ochko bilan 3-o‘rinda bormoqda.