BAAning Dubay shahrida bo‘lib o‘tayotgan boks bo‘yicha Osiyo chempionatining ikkinchi kunida bir qator o‘zbekistonlik bokschilar ringga ko‘tarildi.

-49 kg vazn toifasida harakat qiladigan Nodirjon Mirzaahmedov musobaqadagi dastlabki jangini Iroq vakili Musa Jaffar Hoshimga qarshi o‘tkazdi. Unda o‘zbekistonlik bokschi 5:0 hisobida g‘alaba qozondi.

-56 kg vazn toifasining birinchi raqamli bokschisi Mirazizbek Mirzaxalilov hindistonlik Muhammad Hussamga qarshi jang qildi va 5:0 hisobi bilan zafar quchdi.

-64 kg vazn toifasida O‘zbekiston sharafini himoya qilayotgan Elnur Abduraimov musobaqadagi dastlabki jangini afg‘onistonlik Sulton Muhammadga qarshi o‘tkazdi va 5:0 hisobidagi g‘alabani qo‘lga kiritdi.

-91 kg vaznda harakat qilayotgan Sanjar Tursunov ham Afg‘oniston vakili Abdulqodirga qarshi jang qildi. Unda o‘zbekistonlik bokschi ishonchli g‘alabani qo‘lga kiritdi — 5:0.

Shuningdek, O‘zbekiston ayollar terma jamoasining to‘rt vakili ham dastlabki janglarda ishtirok etdi. Gulasal Sultonaliyeva va Sitora Turdibekova g‘alaba qozongan holda keyingi bosqichga yo‘l oldi. Tajribali bokschilar Tursunoy Rahimova va Rayhona Qodirova kutilmagandan mag‘lubiyatga uchrab, musobaqa bilan xayrlashdi.

Avvalroq Mirazizbek Mirzaxalilov va Nodirjon Mirzaahmedov musobaqadagi dastlabki janglarini g‘alaba bilan yakunlagani xabar qilingandi.