БААнинг Дубай шаҳрида бўлиб ўтаётган бокс бўйича Осиё чемпионатининг иккинчи кунида бир қатор ўзбекистонлик боксчилар рингга кўтарилди.

-49 кг вазн тоифасида ҳаракат қиладиган Нодиржон Мирзааҳмедов мусобақадаги дастлабки жангини Ироқ вакили Муса Жаффар Ҳошимга қарши ўтказди. Унда ўзбекистонлик боксчи 5:0 ҳисобида ғалаба қозонди.

-56 кг вазн тоифасининг биринчи рақамли боксчиси Миразизбек Мирзахалилов ҳиндистонлик Муҳаммад Ҳуссамга қарши жанг қилди ва 5:0 ҳисоби билан зафар қучди.

-64 кг вазн тоифасида Ўзбекистон шарафини ҳимоя қилаётган Элнур Абдураимов мусобақадаги дастлабки жангини афғонистонлик Султон Муҳаммадга қарши ўтказди ва 5:0 ҳисобидаги ғалабани қўлга киритди.

-91 кг вазнда ҳаракат қилаётган Санжар Турсунов ҳам Афғонистон вакили Абдулқодирга қарши жанг қилди. Унда ўзбекистонлик боксчи ишончли ғалабани қўлга киритди — 5:0.

Шунингдек, Ўзбекистон аёллар терма жамоасининг тўрт вакили ҳам дастлабки жангларда иштирок этди. Гуласал Султоналиева ва Ситора Турдибекова ғалаба қозонган ҳолда кейинги босқичга йўл олди. Тажрибали боксчилар Турсуной Раҳимова ва Райҳона Қодирова кутилмагандан мағлубиятга учраб, мусобақа билан хайрлашди.

Аввалроқ Миразизбек Мирзахалилов ва Нодиржон Мирзааҳмедов мусобақадаги дастлабки жангларини ғалаба билан якунлагани хабар қилинганди.