O‘zbekiston U21 terma jamoasi Ukrainadagi an’anaviy Valeriy Lobanovskiy xalqaro xotira turniri doirasida bugun Ozarboyjonga qarshi bahs olib bordi. Temur Kapadze shogirdlari unda kichik hisobda g‘alaba qozonishga muvaffaq bo‘ldi.

Vakillarimiz birinchi bo‘limda har tomonlama ustunlikka ega bo‘lishdi. Yoshlarimiz to‘pni nazorat qilishda ham, xavfli vaziyatlar yaratish bo‘yicha ham raqibdan kuchli ekani sezilib turdi. Faqat vaziyatlarni golga aylantirishda futbolchilarimiz oqsashdi.

O‘zbekiston U21 jamoasi ikkinchi bo‘limni ham hujumkorlik bilan boshladi va raqib darvozasi oldida xafli vaziyatlar yarata boshladi. Ammo Ozarboyjon posboni ishonchli o‘ynashda davom etgan bo‘lsa, ba’zida yigitlarga omad yetishmadi. Xususan, Ibragimov 65-daqiqada yo‘llagan jarima zarbasi natijasida to‘p to‘singa tegib qaytdi. Oradan 10 daqiqa o‘tib esa Jasur Jaloliddinov 28 metrlardan jarima zarbasi orqali "to‘qqizlik"ka to‘pni "mixlab" qo‘ydi.

Ozarboyjonliklar hisobni tenglashtirishga harakat qilishdi, ammo Kapadze shogirdlari hisobni yiriklashtirish uchun imkoniyatlarga ega bo‘lishdi. O‘yinda esa hisob boshqa o‘zgarmadi.

Ozarboyjon 1-turda Ukrainani 1:0 hisobida mag‘lub etgan edi. Ertaga esa O‘zbekiston va Ukraina yoshlari so‘nggi tur bahsini o‘tkazishadi. Mazkur uchrashuvdagi durang natija ham vakillarimizga musobaqa g‘olibligini taqdim etadi.

Valeriy Lobanovskiy xalqaro turniri
Ozarboyjon (U-21) - O‘zbekiston (U-21) - 0:1 (0:0)
Gol: Jasur Jaloliddinov (75).
Ozarboyjon (U-21): Samigullin, Aliyev, Agdjabayev (Chelik, 84), Zulfugarli (Gurbanli, 61), S.Abdullazoda, Rzayev (Seidov, 61), V.Jafarov, D.Jafarov (R.Abdullazoda, 67) , Garahmadov (Valizoda, 84), Mustafoyev (Huseynli, 84), Asgerov (Elizada, 61).
O‘zbekiston (U-21): Yo‘ldoshev, Mirsaidov (Begimov, 67), Tursunov (Hamidjonov, 75), Sultonmurodov (Turdaliyev, 71), Shamsiyev, Ibragimov (Xolmatov, 71), Jo‘raqo‘ziyev (Jaloliddinov, 67), Abdumannonov (Norchayev, 67), Bo‘riyev (Roziyev, 75), Mamasidiqov (Hoshimov, 67), Odilov (Rahimkulov, 72).
Ogohlantirishlar: Zulfugarli, Asgerov, V.Jafarov - Shamsiyev, Odilov, Jaloliddinov, Turdaliyev.
Chetlatishlar: S.Abdullazoda (o‘yindan keyin) — Shamsiyev (90+1), Roziyev (o‘yindan keyin)
Hakam: Yevgeniy Aranovskiy (Ukraina).