Ўзбекистон U21 терма жамоаси Украинадаги анъанавий Валерий Лобановский халқаро хотира турнири доирасида бугун Озарбойжонга қарши баҳс олиб борди. Темур Кападзе шогирдлари унда кичик ҳисобда ғалаба қозонишга муваффақ бўлди.

Вакилларимиз биринчи бўлимда ҳар томонлама устунликка эга бўлишди. Ёшларимиз тўпни назорат қилишда ҳам, хавфли вазиятлар яратиш бўйича ҳам рақибдан кучли экани сезилиб турди. Фақат вазиятларни голга айлантиришда футболчиларимиз оқсашди.

Ўзбекистон U21 жамоаси иккинчи бўлимни ҳам ҳужумкорлик билан бошлади ва рақиб дарвозаси олдида хафли вазиятлар ярата бошлади. Аммо Озарбойжон посбони ишончли ўйнашда давом этган бўлса, баъзида йигитларга омад етишмади. Хусусан, Ибрагимов 65-дақиқада йўллаган жарима зарбаси натижасида тўп тўсинга тегиб қайтди. Орадан 10 дақиқа ўтиб эса Жасур Жалолиддинов 28 метрлардан жарима зарбаси орқали "тўққизлик"ка тўпни "михлаб" қўйди.

Озарбойжонликлар ҳисобни тенглаштиришга ҳаракат қилишди, аммо Кападзе шогирдлари ҳисобни йириклаштириш учун имкониятларга эга бўлишди. Ўйинда эса ҳисоб бошқа ўзгармади.

Озарбойжон 1-турда Украинани 1:0 ҳисобида мағлуб этган эди. Эртага эса Ўзбекистон ва Украина ёшлари сўнгги тур баҳсини ўтказишади. Мазкур учрашувдаги дуранг натижа ҳам вакилларимизга мусобақа ғолиблигини тақдим этади.

Валерий Лобановский халқаро турнири
Озарбойжон (U-21) - Ўзбекистон (U-21) - 0:1 (0:0)
Гол: Жасур Жалолиддинов (75).
Озарбойжон (U-21): Самигуллин, Алиев, Агджабаев (Челик, 84), Зулфугарли (Гурбанли, 61), С.Абдуллазода, Рзаев (Сеидов, 61), В.Жафаров, Д.Жафаров (Р.Абдуллазода, 67) , Гараҳмадов (Вализода, 84), Мустафоев (Ҳусейнли, 84), Асгеров (Елизада, 61).
Ўзбекистон (U-21): Йўлдошев, Мирсаидов (Бегимов, 67), Турсунов (Ҳамиджонов, 75), Султонмуродов (Турдалиев, 71), Шамсиев, Ибрагимов (Холматов, 71), Жўрақўзиев (Жалолиддинов, 67), Абдуманнонов (Норчаев, 67), Бўриев (Розиев, 75), Мамасидиқов (Ҳошимов, 67), Одилов (Раҳимкулов, 72).
Огоҳлантиришлар: Зулфугарли, Асгеров, В.Жафаров - Шамсиев, Одилов, Жалолиддинов, Турдалиев.
Четлатишлар: С.Абдуллазода (ўйиндан кейин) — Шамсиев (90+1), Розиев (ўйиндан кейин)
Ҳакам: Евгений Арановский (Украина).