"Bavariya"ni erkin agent sifatida tark etgan himoyachi Jerom Boateng faoliyatini "Roma"da davom ettirishi mumkin. Bu haqda La Gazzetta dello Sport nashri xabar tarqatmoqda. Manbaning xabariga ko‘ra, rimliklarning yangi bosh murabbiyi Joze Mourinyo 32 yoshli himoyachining xizmatlariga qiziqish bildirmoqda.
O‘yinni himoya asosida qurish uchun portugaliyalik mutaxassisga tajribali futbolchilar kerak. 2020/21-yilgi mavsum Boateng "Bavariya" tarkibida barcha musobaqalarda 39 ta uchrashuv o‘tkazib, ikkita gol va bitta golli uzatmaga mualliflik qildi. Aprel oyida "Barselona" va "Tottenham" ham nemis himoyachisiga qiziqish bildirishgan edi.
