Yevropa chempionlar ligasining navbatdagi mavsumi yakuniga yetdi. "Manchester Siti" va "Chelsi" jamoalari o‘rtasidagi hal qiluvchi bahsda Tuxel shogirdlari g‘alaba qozonishdi.

Bahsning birinchi bo‘limida, kutilganidek, ancha faol o‘yin namoyish etishdi. Uchrashuv boshida Sterling aniq zarba yo‘llashiga himoyachilar imkon berishmagan bo‘lsa, keyinchalik Timo Verner 2ta imkoniyatdan foydalana olmadi. 27-daqiqada esa Fil Foden ajoyib vaziyatga chiqib bordiyu, ammo Ryudiger uning zarba berishga yo‘l qo‘ymadi.

Uchrashuvning 42-daqiqasida esa hisob ochildi. Mauntning aniq uzatmasidan keyin Xavers yakkama-yakka vaziyatga chiqib ketib, "Chelsi"ni oldinga olib chiqdi.

Ikkinchi bo‘limda esa londonliklar ajoyib himoyalanishgan bo‘lsa, Gvardiola jamoasi esa raqibga "syurpriz" taqdim eta olmadi. Taymga qo‘shib berilgan 6-daqiqada esa Mahrezning zarbasiga birozgina aniqlik yetishmadi: to‘p to‘sin ustidan o‘tib ketdi.

Shu tariqa, "Chelsi" Chempionlar ligasining 2021-yilgi g‘olibiga aylandi! "Ko‘klar" o‘z tarixlarida ikkinchi marta ushbu sovrin g‘olibiga aylanishdi.

Yevropa chempionlar ligasi. final
Manchester Siti Angliya – Chelsi Angliya 0:1 (0:1, 0:0)
Gol: 0:1 – 42 Xaverts.
Manchester Siti – Ederson, Stounz, Ruben Diash, Uoker, Zinchenko, Foden, Bernardu Silva (Fernandinyo, 64), Sterling (Aguero, 77), de Bryuyne (Gabriel Jezus, 60), Marez, Gyundogan.
Chelsi – Mendi, Chiluell, Djeyms, Ryudiger, Aspilikueta, Maunt (Kovachich, 80), Jorjinyo, Xaverts, Kante, Tiago Silva (Kristensen, 39), Verner (Pulishich, 66).
Ogohlantirishlar: Gyundogan (34), Ryudiger (57), Gabriel Jezus (88).