«Chelsi» bosh murabbiyi Tomas Tuxel London klubi egasi Roman Abramovichdan bir nechta yangi futbolchilarni sotib olishni so‘radi, deb xabar bermoqda The Telegraph.
«Chelsi» yozgi transferlar bilan tarkibni kuchaytirish uchun 200 million funt (232 million yevro) sarf qilishi mumkin. Tuxelning istaklar ro‘yxatidan hujumchi, yarim himoyachi va himoyachi sotib olish o‘rin olgan. Tuxel Abramovich bilan Portuda 30 may kuni Chempionlar Ligasi finalidan keyin, Angliyaga uchib ketish oldidan uchrashgan.
Murabbiy va klub egasi «Inter» hujumchisi Romelu Lukaku hamda «Tottenxem» hujumchisi Xarri Keyn va «Vulverxempton» futbolchisi Adama Traoreni sotib olish kabi transferlarni muhokama qilishgan.
Tuxelning shaxsan o‘zi «Borussiya M»dan Yonas Xofmann, «Vest Xem»dan Deklan Rays va «Monako» dan Aureliyene Chuameniga qiziqish bildirgan. Shuningdek, Tuxel va Abramovich himoyachi Tiago Silvaning shartnomasini yana bir yilga uzaytirishga kelishib olganlar.
Nemis murabbiyi yana bir markaziy himoyachi Antonio Ryudigerning shartnomasi yangilanishini istamoqda, ammo ingliz klubi muzokaralarda hali ham muvaffaqiyatga erishmagan. Eslatib o‘tamiz, o‘tgan yozda «Chelsi» yettita yangi o‘yinchi uchun 200 million funt sarflagan edi.
