«Olimpik» — «Neftchi» (3:0) uchrashuvidan so‘ng jamoamiz bosh murabbiyi Temur Kapadze matbuot anjumanida ishtirok etdi.

O‘yin haqida

— Albatta kam sonli bo‘lsa ham jamoamiz muxlislarini bugungi g‘alaba bilan tabriklayman. Bugun yigitlar yaxshi o‘yin ko‘rsatishdi. O‘tgan uchrashuvdan so‘ng bir oz kayfiyatim yo‘qroq edi. Kamchiliklarni ko‘rib chiqib bu o‘yinga munosib tayyorgarlik ko‘rdik. Bugun ko‘rsatgan o‘yinimiz bo‘yicha g‘alabaga haqli edik deb o‘ylayman.

— O‘tgan o‘yindagi mag‘lubiyatga sabab sifatida Ukrainada tashkil etilgan turnirni sabab qilib ko‘rsatish mumkinmi?
— Yo‘q, bu yerda adaptasiya, ya’ni moslashishning o‘rni muhim. U yerdagi va Toshkentdagi ob-havoda farq bor. Shaxsiy fikrim, ob-havoga moslashish ta’sir qildi. «Dinamo» ham yaxshi kurashdi deb o‘ylayman. Aytib o‘tganimdek, har bir o‘yin yigitlarga tajriba bo‘lmoqda.

— «Lokomotiv»da jamoani qiyin vaziyatda boshqaruvni olgandingiz. O‘shanda ham bugungi kabi himoyaga e’tibor qaratib sifatli uzatmalar asosida o‘yin tashkil etgandingiz...
— Bilasizmi, o‘yin uslubi raqibga bog‘liq. «Neftchi» uzun paslar evaziga o‘yin tashkil etmoqda. Bunaqa holatda pressing tashkil  qilishning foydasi yo‘q. Biz vaziyatlarni kutdik va tezkor qarshi hujumga o‘tdik. Issiq ob-havoda kuchni to‘g‘ri taqsimlashni o‘rni muhim.

— «Olimpik» birinchi bo‘limda ikkinchi raqamli bo‘lib o‘ynadi. Taktik ko‘rsatma shunday edimi?
— Yo‘q, aytib o‘tganimdek katta kuch bilan oldinga borishning foydasi yo‘q edi. Biz vaziyatni kutdik, raqibning har bir uzatmasiga tayyor turdik.

— 9-raqamli futbolchi (Temur Mamasidiqov nazarda tutilmoqda)da uzatma berishni hohlamayotgandek ko‘rindi. Ba’zi vaziyatlardan u foydalana olmadi...
— Temur Mamasidiqov o‘yindan-o‘yinga o‘sib bormoqda. U bugun ham yaxshi o‘ynadi, gol ham urdi. Kerak vaziyatda uzatma ham berdi. Bu yosh futbolchilarda kuzatiladigan xolat. Raqib posboni ham ko‘plab vaziyatlarda zarbalarni qaytardi. Ishlashda davom etamiz, yosh futbolchilarimiz bu kabi o‘yinlarda tajriba to‘plab borishadi.